ek nazar hum pe bhi ho sanam kam se kam

ik nazar ham pe bhī ho sanam kam se kam

duur ho jaa.eñ dard-o-alam kam se kam

apne jalvoñ kī duniyā idhar bhī sajā

taaki ho merā ghar bhī iram kam se kam

ishq meñ faḳhr se pā-ba-zanjīr huuñ

TuuTe hargiz na us kā bharam kam se kam

nauhe shikve kī be-shak nafī hī sahī

dard itnā ki ho aañkh nam kam se kam

lutf-e-aish-o-tarab kī nahīñ hai talab

maiñ rahūñ tere bas ham-qadam kam se kam

pyaar tū mujh se kar yā na kar ġham nahīñ

haañ magar kar na mujh par sitam kam se kam

sher likhnā hai 'nādir' ḳhudā vāste

de de kāġhaz siyāhī qalam kam se kam

ek nazar hum pe bhi ho sanam kam se kam

dur ho jaen dard-o-alam kam se kam

apne jalwon ki duniya idhar bhi saja

taki ho mera ghar bhi iram kam se kam

ishq mein faKHr se pa-ba-zanjir hun

TuTe hargiz na us ka bharam kam se kam

nauhe shikwe ki be-shak nafi hi sahi

dard itna ki ho aankh nam kam se kam

lutf-e-aish-o-tarab ki nahin hai talab

main rahun tere bas ham-qadam kam se kam

pyar tu mujh se kar ya na kar gham nahin

han magar kar na mujh par sitam kam se kam

sher likhna hai 'nadir' KHuda waste

de de kaghaz siyahi qalam kam se kam