ek ranj-e-dil ke jis se siwa chahta nahin

ik ranj-e-dil ke jis se sivā chāhtā nahīñ

kuchh bhī ho phir maiñ us kī jagah chāhtā nahīñ

us ko bhī maiñ talab huuñ magar mujh se kuchh judā

koī bhī mujh ko merī tarah chāhtā nahīñ

uktā chukā huuñ ruuh kī lā-fāniyat se par

vo jism huuñ ke rāh-e-fanā chāhtā nahīñ

koī bhī tere zaḳhm sī tāsīr kaise de

lekin maiñ us kā aur maza chāhtā nahīñ

is baar tū mile to tujhe chūmnā bhī hai

maiñ zindagī meñ aur gila chāhtā nahīñ

har lā-davā maraz ko duāoñ se hai umiid

terā koī marīz davā chāhtā nahīñ

maanā ki ahd-e-vasl kā bhī paas hai magar

āḳhir vo kaise ho jo ḳhudā chāhtā nahīñ

ek ranj-e-dil ke jis se siwa chahta nahin

kuchh bhi ho phir main us ki jagah chahta nahin

us ko bhi main talab hun magar mujh se kuchh juda

koi bhi mujh ko meri tarah chahta nahin

ukta chuka hun ruh ki la-faniyat se par

wo jism hun ke rah-e-fana chahta nahin

koi bhi tere zaKHm si tasir kaise de

lekin main us ka aur maza chahta nahin

is bar tu mile to tujhe chumna bhi hai

main zindagi mein aur gila chahta nahin

har la-dawa maraz ko duaon se hai umid

tera koi mariz dawa chahta nahin

mana ki ahd-e-wasl ka bhi pas hai magar

aaKHir wo kaise ho jo KHuda chahta nahin