ek shama ka saya tha ki mehrab mein Duba

ik sham.a kā saaya thā ki mehrāb meñ Duubā

ik maiñ ki tire hijr ke girdāb meñ Duubā

merī shab-e-tārīk kā chehra huā raushan

sūraj sā koī shaam ko mahtāb meñ Duubā

hai dīda-e-be-ḳhvāb mirā kitnā farebī

jab dekhiye lagtā hai kisī ḳhvāb meñ Duubā

dil thā ki koī khel meñ pheñkā huā patthar

maujoñ se jo laḌtā huā tālāb meñ Duubā

khultā hai faqat itnā vo az-rāh-e-muravvat

miltā hai magar majlisī ādāb meñ Duubā

pātāl kī gahrā.ī se ubhrā mirā aañsū

chupke se phir ik kūza-e-be-āb meñ Duubā

thā jis kā falak-bos fasīloñ meñ tahaffuz

vo ghar bhī mirā vaqt ke sailāb meñ Duubā

ek shama ka saya tha ki mehrab mein Duba

ek main ki tere hijr ke girdab mein Duba

meri shab-e-tarik ka chehra hua raushan

suraj sa koi sham ko mahtab mein Duba

hai dida-e-be-KHwab mera kitna farebi

jab dekhiye lagta hai kisi KHwab mein Duba

dil tha ki koi khel mein phenka hua patthar

maujon se jo laDta hua talab mein Duba

khulta hai faqat itna wo az-rah-e-murawwat

milta hai magar majlisi aadab mein Duba

patal ki gahrai se ubhra mera aansu

chupke se phir ek kuza-e-be-ab mein Duba

tha jis ka falak-bos fasilon mein tahaffuz

wo ghar bhi mera waqt ke sailab mein Duba