ek shor sameTo jiwan bhar aur chup dariya mein utar jao

ik shor sameTo jīvan bhar aur chup dariyā meñ utar jaao

duniyā ne tum ko tanhā kiyā tum is ko tanhā kar jaao

is hijr o visāl ke biich kahīñ ik lamhe ko jī chāhtā hai

bas abr-o-havā ke saath phiro aur jism o jaañ se guzar jaao

tum reza reza ho kar bhī jo ḳhud ko sameTe phirte ho

so ab ke havā pazhmurda hai is baar zarā sā bikhar jaao

jañgal kā ghanerā añdhiyārā ab aan basā hai shahroñ meñ

in shahroñ ko yūñhī rahnā hai ab zinda raho yā mar jaao

ik tārīk havā kā jhoñkā ruk ke ye mujh se kahtā hai

ye raushan galiyāñ jhūTī haiñ tum 'sābir' apne ghar jaao

ek shor sameTo jiwan bhar aur chup dariya mein utar jao

duniya ne tum ko tanha kiya tum is ko tanha kar jao

is hijr o visal ke bich kahin ek lamhe ko ji chahta hai

bas abr-o-hawa ke sath phiro aur jism o jaan se guzar jao

tum reza reza ho kar bhi jo KHud ko sameTe phirte ho

so ab ke hawa pazhmurda hai is bar zara sa bikhar jao

jangal ka ghanera andhiyara ab aan basa hai shahron mein

in shahron ko yunhi rahna hai ab zinda raho ya mar jao

ek tarik hawa ka jhonka ruk ke ye mujh se kahta hai

ye raushan galiyan jhuTi hain tum 'sabir' apne ghar jao