ek sukut-e-bekaran shoala-bayani se alag

ik sukūt-e-bekarāñ sho.ala-bayānī se alag

ek duniyā hai mire shahr-e-ma.ānī se alag

mauj ḳhud sākit khaḌī thī yā ki thā ye dām-e-āb

kyā thā vo Thahrāv sā paiham ravānī se alag

vo bayāñ āhang jis kā dil ko chhalnī kar gayā

garm-guftārī se haT kar be-zabānī se alag

saarī ḳhushiyāñ jhuuT haiñ har muskurāhaT hai fareb

aao ik duniyā basā.eñ shādmānī se alag

maiñ bhī apnī zaat ke haibat-kade meñ huuñ asiir

vo bhī rūh-e-muztarib qaid-e-makānī se alag

rabt-e-bāham par na thā harf-e-tasalsul kā murād

ya.anī har kirdār thā dil kī kahānī se alag

aur kitnā roiyegā yaad kar 'āzād' ko

ek din honā hī thā is dār-e-fānī se alag

ek sukut-e-bekaran shoala-bayani se alag

ek duniya hai mere shahr-e-maani se alag

mauj KHud sakit khaDi thi ya ki tha ye dam-e-ab

kya tha wo Thahraw sa paiham rawani se alag

wo bayan aahang jis ka dil ko chhalni kar gaya

garm-guftari se haT kar be-zabani se alag

sari KHushiyan jhuT hain har muskurahaT hai fareb

aao ek duniya basaen shadmani se alag

main bhi apni zat ke haibat-kade mein hun asir

wo bhi ruh-e-muztarib qaid-e-makani se alag

rabt-e-baham par na tha harf-e-tasalsul ka murad

yani har kirdar tha dil ki kahani se alag

aur kitna roiyega yaad kar 'azad' ko

ek din hona hi tha is dar-e-fani se alag