ek talluq nahin sambhla to bhanwar tak pahuncha

ik ta.alluq nahīñ sambhlā to bhañvar tak pahuñchā

dekhte dekhte paanī mire sar tak pahuñchā

tujh se bichhḌe to na raas aa.ī koī bhī manzil

phir junūñ merā tirī rāhguzar tak pahuñchā

is qadar dhuup meñ shiddat thī ki ghabrā kar dil

saa.e kī aas meñ be-sāya shajar tak pahuñchā

kho gayā din ke ujāloñ se milā kar mujh ko

ek sitāra jo mire saath sahar tak pahuñchā

ik takabbur se hunar aib meñ tabdīl huā

aib ehsās-e-nadāmt se hunar tak pahuñchā

ek be-samt bagūlā thā vo 'nusrat' jis ne

shakl insān kī dhārī mire ghar tak pahuñchā

ek talluq nahin sambhla to bhanwar tak pahuncha

dekhte dekhte pani mere sar tak pahuncha

tujh se bichhDe to na ras aai koi bhi manzil

phir junun mera teri rahguzar tak pahuncha

is qadar dhup mein shiddat thi ki ghabra kar dil

sae ki aas mein be-saya shajar tak pahuncha

kho gaya din ke ujalon se mila kar mujh ko

ek sitara jo mere sath sahar tak pahuncha

ek takabbur se hunar aib mein tabdil hua

aib ehsas-e-nadamt se hunar tak pahuncha

ek be-samt bagula tha wo 'nusrat' jis ne

shakl insan ki dhaari mere ghar tak pahuncha