ek tamanna mein giraftar the hum bhi tum bhi

ik tamannā meñ giraftār the ham bhī tum bhī

saarī duniyā ke gunahgār the ham bhī tum bhī

dilkashī dekh ke chaḌhte hue dariyāoñ kī

Dūbne ke liye tayyār the ham bhī tum bhī

be-sabab donoñ meñ har ek ko dilchaspī thī

aur har ek se bezār the ham bhī tum bhī

kāmyāb aise kahāñ apne muḳhālif hote

mustaqil un ke madad-gār the ham bhī tum bhī

aaj tak jiine kā ilzām liye phirte haiñ

chand sāñsoñ ke ḳhatāvār the ham bhī tum bhī

muskurāhaT meñ kabhī ġham ko chhupā hī na sake

ya.anī nākām adākār the ham bhī tum bhī

ek tamanna mein giraftar the hum bhi tum bhi

sari duniya ke gunahgar the hum bhi tum bhi

dilkashi dekh ke chaDhte hue dariyaon ki

Dubne ke liye tayyar the hum bhi tum bhi

be-sabab donon mein har ek ko dilchaspi thi

aur har ek se bezar the hum bhi tum bhi

kaamyab aise kahan apne muKHalif hote

mustaqil un ke madad-gar the hum bhi tum bhi

aaj tak jine ka ilzam liye phirte hain

chand sanson ke KHatawar the hum bhi tum bhi

muskurahaT mein kabhi gham ko chhupa hi na sake

yani nakaam adakar the hum bhi tum bhi