ek tarannum sa mere paon ki zanjir mein hai

ik tarannum sā mire paaoñ kī zanjīr meñ hai

phir koī fasl-e-bahārāñ mirī taqdīr meñ hai

jhilmilāte haiñ sitāre ki diye julte haiñ

kuchh ujālā sā tirī zulf-e-girah-gīr meñ hai

kuchh tirā husn bhī hai sāda-o-ma.asūm bahut

kuchh mirā pyaar bhī shāmil tirī tasvīr meñ hai

aur baḌhtī hai isī shaḳhs kī chāhat nāseh

ye karāmāt ajab aap kī taqrīr meñ hai

apnī khoī huī chhīnī huī jannat kā surāġh

halqa-e-dār meñ hai jumbish-e-shamshīr meñ hai

maiñ jo chāhūñ to pighal jaa.eñ judā.ī ke pahāḌ

ye bhī tāsīr mire nāla-e-shab-gīr meñ hai

māh-o-ḳhurshīd zamīñ par nahīñ utre ab tak

merā har ḳhvāb abhī parda-e-ta.abīr meñ hai

ek tarannum sa mere paon ki zanjir mein hai

phir koi fasl-e-bahaaran meri taqdir mein hai

jhilmilate hain sitare ki diye julte hain

kuchh ujala sa teri zulf-e-girah-gir mein hai

kuchh tera husn bhi hai sada-o-masum bahut

kuchh mera pyar bhi shamil teri taswir mein hai

aur baDhti hai isi shaKHs ki chahat naseh

ye karamat ajab aap ki taqrir mein hai

apni khoi hui chhini hui jannat ka suragh

halqa-e-dar mein hai jumbish-e-shamshir mein hai

main jo chahun to pighal jaen judai ke pahaD

ye bhi tasir mere nala-e-shab-gir mein hai

mah-o-KHurshid zamin par nahin utre ab tak

mera har KHwab abhi parda-e-tabir mein hai