ek tasalsul se ek aziyyat ko jaanib-e-dil uchhaalta hai koi

ik tasalsul se ek aziyyat ko jānib-e-dil uchhāltā hai koī

ek mushkil se nīm-jāñ ho kar ḳhud ko kaise sambhāltā hai koī

bujhtī palkoñ se tāktī vahshat shukr kar ham tujhe mayassar haiñ

hameñ jo rog ho ga.e lāhiq dekh vo bhī ujāltā hai koī

imtihāñ meñ paḌe hue ye log ik ta.assuf se dekhtā hai jahāñ

haa.e aise ḳharāb hāloñ ke kahāñ shajre khañgāltā hai koī

gard-e-rāh-e-safar hī haiñ ham log ain-mumkin hai bhuul jaao hameñ

jis tarah ghar kā fāltū sāmāñ be-dilī se nikāltā hai koī

ba.ad mere bhī kitne log aa.e tum ko achchhe lage tumhāre hue

kyā kabhī chup kī sā.atoñ meñ tumheñ mirī tarah sambhāltā hai koī

ek tasalsul se ek aziyyat ko jaanib-e-dil uchhaalta hai koi

ek mushkil se nim-jaan ho kar KHud ko kaise sambhaalta hai koi

bujhti palkon se takti wahshat shukr kar hum tujhe mayassar hain

hamein jo rog ho gae lahiq dekh wo bhi ujalta hai koi

imtihan mein paDe hue ye log ek tassuf se dekhta hai jahan

hae aise KHarab haalon ke kahan shajre khangalta hai koi

gard-e-rah-e-safar hi hain hum log ain-mumkin hai bhul jao hamein

jis tarah ghar ka faltu saman be-dili se nikalta hai koi

baad mere bhi kitne log aae tum ko achchhe lage tumhaare hue

kya kabhi chup ki saaton mein tumhein meri tarah sambhaalta hai koi