iklauti jagir ko takte takte thak kar so jate hain

iklautī jāgīr ko takte takte thak kar so jaate haiñ

ham terī tasvīr ko takte takte thak kar so jaate haiñ

baiThe baiThe āzādī ke ḳhvāb sajāte rahte haiñ phir

pairoñ kī zanjīr ko takte takte thak kar so jaate haiñ

kāġhaz par pechīda misroñ kī bhar-mār lagā dete haiñ

phir dīvān-e-mīr ko takte takte thak kar so jaate haiñ

apne tiir kamān ke chhin jaane kā girya karne vaale

auroñ kī shamshīr ko takte takte thak kar so jaate haiñ

daur-e-jadīd hai saare rāñjhe apne apne mobile par

apnī apnī hiir ko takte takte thak kar so jaate haiñ

din bhar saḌkoñ par injīreñ bechne vaale bhūke bachche

raat ga.e injīr ko takte takte thak kar so jaate haiñ

'ġhālib' kī ġhazleñ paḌhte haiñ 'zauq' se shikva karte haiñ

'saudā' aur 'dabīr' ko takte takte thak kar so jaate haiñ

chhoTī chhoTī bātoñ par yuuñ ḳhuun ḳharāba ho jaatā hai

ham 'ehrām' zamīr ko takte takte thak kar so jaate haiñ

iklauti jagir ko takte takte thak kar so jate hain

hum teri taswir ko takte takte thak kar so jate hain

baiThe baiThe aazadi ke KHwab sajate rahte hain phir

pairon ki zanjir ko takte takte thak kar so jate hain

kaghaz par pechida misron ki bhar-mar laga dete hain

phir diwan-e-mir ko takte takte thak kar so jate hain

apne tir kaman ke chhin jaane ka girya karne wale

auron ki shamshir ko takte takte thak kar so jate hain

daur-e-jadid hai sare ranjhe apne apne mobile par

apni apni hir ko takte takte thak kar so jate hain

din bhar saDkon par injiren bechne wale bhuke bachche

raat gae injir ko takte takte thak kar so jate hain

'ghaalib' ki ghazlen paDhte hain 'zauq' se shikwa karte hain

'sauda' aur 'dabir' ko takte takte thak kar so jate hain

chhoTi chhoTi baaton par yun KHun KHaraba ho jata hai

hum 'ehram' zamir ko takte takte thak kar so jate hain