ilahi ab ke jo aae to yun bahaar aae

ilāhī ab ke jo aa.e to yuuñ bahār aa.e

ki apne saath liye bū-e-zulf-e-yār aa.e

ye baat kyā hai jo yuuñ kho.e kho.e rahte ho

zarūr tum kahīñ jā kar dil apnā haar aa.e

jab un kī bazm ho ham hoñ aur un ke jalve hoñ

vo din bhī ziist meñ ai kaash ek baar aa.e

hamāre ghar bhī vo ik din zarūr ā.eñge

tamām umr is ummīd par guzār aa.e

yahīñ tamām hoñ apnī bachī-khuchī sāñseñ

tamanna le ke yahī ham tire dayār aa.e

dil-o-jigar hoñ agar mubtalā-e-dard-e-firāq

kisī ko aise meñ aa.e to kyā qarār aa.e

ye apnā apnā muqaddar hai is ko kyā kiije

kisī ko gul to mayassar kisī ko ḳhaar aa.e

vatan ko de na sake kuchh bhī khokhle na.are

jab aa.e kaam to bas ham vafā-shi.ār aa.e

hamesha jin ke liye jaan detā rahtā thā

tujhe 'nasīr' vahī qabr meñ utaar aa.e

ilahi ab ke jo aae to yun bahaar aae

ki apne sath liye bu-e-zulf-e-yar aae

ye baat kya hai jo yun khoe khoe rahte ho

zarur tum kahin ja kar dil apna haar aae

jab un ki bazm ho hum hon aur un ke jalwe hon

wo din bhi zist mein ai kash ek bar aae

hamare ghar bhi wo ek din zarur aaenge

tamam umr is ummid par guzar aae

yahin tamam hon apni bachi-khuchi sansen

tamanna le ke yahi hum tere dayar aae

dil-o-jigar hon agar mubtala-e-dard-e-firaq

kisi ko aise mein aae to kya qarar aae

ye apna apna muqaddar hai is ko kya kije

kisi ko gul to mayassar kisi ko KHar aae

watan ko de na sake kuchh bhi khokhle nare

jab aae kaam to bas hum wafa-shiar aae

hamesha jin ke liye jaan deta rahta tha

tujhe 'nasir' wahi qabr mein utar aae