imarat ho ki ghurbat bolti hai

imārat ho ki ġhurbat boltī hai

ba-har-sūrat sharāfat boltī hai

vahāñ bāzār kā hotā hai manzar

jahāñ ghar kī zarūrat boltī hai

zabāñ ḳhāmosh hī rahtī hai lekin

mire chehre kī rañgat boltī hai

ba-zāhir guftugū hai muḳhlisāna

magar dil meñ kudūrat boltī hai

vo patthar mom ban jaa.e na kaise

ki sar chaḌh ke mohabbat boltī hai

zabān-e-ilm par taale paḌe haiñ

ba-zo.am-e-ḳhud jahālat boltī hai

zabāneñ kaaT dī jaatī haiñ phir bhī

rag-o-pai se mohabbat boltī hai

'valī' kī zindagī ā.īna-sūrat

sadāqat hī sadāqat boltī hai

imarat ho ki ghurbat bolti hai

ba-har-surat sharafat bolti hai

wahan bazar ka hota hai manzar

jahan ghar ki zarurat bolti hai

zaban KHamosh hi rahti hai lekin

mere chehre ki rangat bolti hai

ba-zahir guftugu hai muKHlisana

magar dil mein kudurat bolti hai

wo patthar mom ban jae na kaise

ki sar chaDh ke mohabbat bolti hai

zaban-e-ilm par tale paDe hain

ba-zoam-e-KHud jahaalat bolti hai

zabanen kaT di jati hain phir bhi

rag-o-pai se mohabbat bolti hai

'wali' ki zindagi aaina-surat

sadaqat hi sadaqat bolti hai