imkan khule dar ka har aan bahut rakkha

imkān khule dar kā har aan bahut rakkhā

is gumbad-e-be-dar ne hairān bahut rakkhā

ābād kiyā dil ko hañgāma-e-hasrat se

sahrā-e-tag-o-dau ko vīrān bahut rakkhā

ik mauj-e-fanā thī jo roke na rukī āḳhir

dīvār bahut khīñchī darbān bahut rakkhā

tāroñ meñ chamak rakkhī phūloñ meñ mahak rakkhī

aur ḳhaak ke putle meñ imkān bahut rakkhā

jaltī huī battī se gul phuuT nikalte haiñ

mushkil se bhī mushkil ko āsān bahut rakkhā

kuchh hai jo nahīñ hai bas vo kyā hai ḳhudā jaane

yuuñ apnī samajh se ham sāmān bahut rakkhā

mashkūk hai ab har shai āñkhoñ meñ 'suhail' apnī

ham ne but-e-kāfir par īmān bahut rakkhā

imkan khule dar ka har aan bahut rakkha

is gumbad-e-be-dar ne hairan bahut rakkha

aabaad kiya dil ko hangama-e-hasrat se

sahra-e-tag-o-dau ko viran bahut rakkha

ek mauj-e-fana thi jo roke na ruki aaKHir

diwar bahut khinchi darban bahut rakkha

taron mein chamak rakkhi phulon mein mahak rakkhi

aur KHak ke putle mein imkan bahut rakkha

jalti hui batti se gul phuT nikalte hain

mushkil se bhi mushkil ko aasan bahut rakkha

kuchh hai jo nahin hai bas wo kya hai KHuda jaane

yun apni samajh se hum saman bahut rakkha

mashkuk hai ab har shai aankhon mein 'suhail' apni

hum ne but-e-kafir par iman bahut rakkha