imtihan lene chala hai meri binai ka

imtihāñ lene chalā hai mirī bīnā.ī kā

us ko andāza nahīñ baat kī gahrā.ī kā

is liye rok liyā uTThā huā haath ham ne

us ke har vaar meñ andāz thā paspā.ī kā

ḳhvāb likhtī rahīñ āñkheñ dar-o-bām-e-shab par

sub.h ik pahlū dikhātī rahī sachchā.ī kā

ajnabī ho ga.e ik chhat tale rahne vaale

kuchh to kaffāra adā karnā thā yakjā.ī kā

maiñ ne māñgā thā zarā der ko chehra apnā

aa.ina de gayā ik zaḳhm shanāsā.ī kā

bānū-e-shām tire surma.ī āñchal se pare

koī sāthī hai mirī bādiya-paimā.ī kā

ab chaTak yā na chaTak ġhuncha-e-ḳhātir maiñ ne

rāsta chhoḌ diyā dekhnā purvā.ī kā

us se mil kar huī har baar mohabbat taaza

us ne badlā nahīñ andāz pazīrā.ī kā

imtihan lene chala hai meri binai ka

us ko andaza nahin baat ki gahrai ka

is liye rok liya uTTha hua hath hum ne

us ke har war mein andaz tha paspai ka

KHwab likhti rahin aankhen dar-o-baam-e-shab par

subh ek pahlu dikhati rahi sachchai ka

ajnabi ho gae ek chhat tale rahne wale

kuchh to kaffara ada karna tha yakjai ka

main ne manga tha zara der ko chehra apna

aaina de gaya ek zaKHm shanasai ka

banu-e-sham tere surmai aanchal se pare

koi sathi hai meri baadiya-paimai ka

ab chaTak ya na chaTak ghuncha-e-KHatir main ne

rasta chhoD diya dekhna purwai ka

us se mil kar hui har bar mohabbat taza

us ne badla nahin andaz pazirai ka