in buton ki jo chah karte hain

in butoñ kī jo chaah karte haiñ

dil-o-dīñ ko tabāh karte haiñ

ham jo hūroñ se raah karte haiñ

vā.izo kyā gunāh karte haiñ

un se ham rasm-o-rāh karte haiñ

vo ḳharāb-o-tabāh karte haiñ

kyā uThā.eñge tere jaur raqīb

ham haiñ ye jo nibāh karte haiñ

mai-kashoñ ko burā na kah vaa.iz

kyā ye terā gunāh karte haiñ

dekhnā dam meñ pesh-e-dāvar-e-hashr

faisla dād-ḳhvāh karte haiñ

shauq se aao ḳhāna-e-dil meñ

āñkheñ ham farsh-e-rāh karte haiñ

shukr hai mujh ko apnī bazm meñ vo

yaad ab gaah gaah karte haiñ

dekhnā ham raqīb se mil kar

dil meñ us but ke raah karte haiñ

dil mirā aap hī hai ḳhāna-ḳharāb

aap ise kyoñ tabāh karte haiñ

bande tere hī ishq ke haiñ sanam

ham ḳhudā ko gavāh karte haiñ

haa.e jab mar chukā huuñ to vo ab

naama apnā siyāh karte haiñ

ham ko miltā hai rizq be-minnat

shukr-e-fazl-e-ilāh karte haiñ

in hasīnoñ se itnā kah do 'diler'

thaam leñ dil ham aah karte haiñ

in buton ki jo chah karte hain

dil-o-din ko tabah karte hain

hum jo huron se rah karte hain

waizo kya gunah karte hain

un se hum rasm-o-rah karte hain

wo KHarab-o-tabah karte hain

kya uThaenge tere jaur raqib

hum hain ye jo nibah karte hain

mai-kashon ko bura na kah waiz

kya ye tera gunah karte hain

dekhna dam mein pesh-e-dawar-e-hashr

faisla dad-KHwah karte hain

shauq se aao KHana-e-dil mein

aankhen hum farsh-e-rah karte hain

shukr hai mujh ko apni bazm mein wo

yaad ab gah gah karte hain

dekhna hum raqib se mil kar

dil mein us but ke rah karte hain

dil mera aap hi hai KHana-KHarab

aap ise kyon tabah karte hain

bande tere hi ishq ke hain sanam

hum KHuda ko gawah karte hain

hae jab mar chuka hun to wo ab

nama apna siyah karte hain

hum ko milta hai rizq be-minnat

shukr-e-fazl-e-ilah karte hain

in hasinon se itna kah do 'diler'

tham len dil hum aah karte hain