inki jab nukta-wari yaad aai

in kī jab nukta-varī yaad aa.ī

apnī hī be-ḳhabarī yaad aa.ī

yaad aa.ī bhī to yuuñ ahd-e-vafā

aah kī be-asarī yaad aa.ī

aaj kyuuñ un ko ba-āġhosh-e-raqīb

merī hī ham-asarī yaad aa.ī

dil ne phir vaqt se laḌnā chāhā

phir vahī dard-bharī yaad aa.ī

apnā siina huā raushan to unheñ

husn kī kam-nazarī yaad aa.ī

jab bhī dhyān aayā kahīñ manzil kā

raah kī shab-basarī yaad aa.ī

kis ko hāsil hai dimāġh-e-nāla

be-sabab be-hunarī yaad aa.ī

dekh kar be-dilī-e-shauq kā rañg

apnī āshufta-sarī yaad aa.ī

us pe kyā guzrī jo is aalam meñ

phuul ko jāma-darī yaad aa.ī

baaġh kā haal vo dekhā hai 'nazar'

shāḳh thī jo bhī harī yaad aa.ī

in ki jab nukta-wari yaad aai

apni hi be-KHabari yaad aai

yaad aai bhi to yun ahd-e-wafa

aah ki be-asari yaad aai

aaj kyun un ko ba-aghosh-e-raqib

meri hi ham-asari yaad aai

dil ne phir waqt se laDna chaha

phir wahi dard-bhari yaad aai

apna sina hua raushan to unhen

husn ki kam-nazari yaad aai

jab bhi dhyan aaya kahin manzil ka

rah ki shab-basari yaad aai

kis ko hasil hai dimagh-e-nala

be-sabab be-hunari yaad aai

dekh kar be-dili-e-shauq ka rang

apni aashufta-sari yaad aai

us pe kya guzri jo is aalam mein

phul ko jama-dari yaad aai

bagh ka haal wo dekha hai 'nazar'

shaKH thi jo bhi hari yaad aai