inko nafrat ise kya kahte hain

in ko nafrat ise kyā kahte haiñ

ham ko raġhbat ise kyā kahte haiñ

naqd-e-dil le ke hamārā na diyā

ḳhud badaulat ise kyā kahte haiñ

roz-e-furqat bhī to hai tuul bahut

ai qayāmat ise kyā kahte haiñ

har parī-rū pe tujhe aa jaanā

ai tabī.at ise kyā kahte haiñ

ġhair ko bazm meñ biThlā lenā

ham ko ruḳhsat ise kyā kahte haiñ

ek to ishq kā sadma mujh ko

us pe furqat ise kyā kahte haiñ

naqd-e-dil ishq meñ dete haiñ 'saḳhī'

ai saḳhāvat ise kyā kahte haiñ

in ko nafrat ise kya kahte hain

hum ko raghbat ise kya kahte hain

naqd-e-dil le ke hamara na diya

KHud badaulat ise kya kahte hain

roz-e-furqat bhi to hai tul bahut

ai qayamat ise kya kahte hain

har pari-ru pe tujhe aa jaana

ai tabiat ise kya kahte hain

ghair ko bazm mein biThla lena

hum ko ruKHsat ise kya kahte hain

ek to ishq ka sadma mujh ko

us pe furqat ise kya kahte hain

naqd-e-dil ishq mein dete hain 'saKHi'

ai saKHawat ise kya kahte hain