inhi galiyon mein ek aisi gali hai

inhī galiyoñ meñ ik aisī galī hai

jo mere naam se tanhā rahī hai

ab is se aur bhī sham.eñ jalā lo

savād-e-jāñ meñ ik mash.al jalī hai

hamāre sar ga.e sañg-e-harīfāñ

mai-o-mīnā se aafat Tal ga.ī hai

maiñ bahr-e-āzmā.ish bhī jalā huuñ

ki dekhūñ mujh meñ kitnī raushnī hai

ilāhī ḳhair ho in bastiyoñ kī

pas-e-dīvār ik parchhā.īñ sī hai

savād-e-shahr meñ koī balā hai

jo vahshat bin ke pīchhā kar rahī hai

huī phir shaam phir din bhar kī shorish

galī-kūchoñ meñ chhap kar so ga.ī hai

kuchh aise so rahe haiñ shahr vaale

ki ik muddat meñ niiñd un ko milī hai

ye ghar sote ke sote hī na rah jaa.eñ

havā-e-hashr-sāmāñ chal rahī hai

huī phir sub.h zaḳhmoñ ke ufuq se

fazā phir taaza dam ho kar uThī hai

kisī qaidī ko phir ḳhvāboñ se uTh kar

kisī zanjīr ne āvāz dī hai

gharoñ se chand lamhoñ kī rifāqat

bichhaḌ kar shahr kī jānib chalī hai

lahū ristā hai dast-e-shīsha-gar se

fazā ā.īna-ḳhāna ban ga.ī hai

phir apne dā.ere qauseñ banā.e

vahī miTTī vahī kūza-garī hai

tum is se kyā bachoge 'shauq'-sāhab

ki qismat meñ yahī gardish likhī hai

inhi galiyon mein ek aisi gali hai

jo mere nam se tanha rahi hai

ab is se aur bhi shamen jala lo

sawad-e-jaan mein ek mashal jali hai

hamare sar gae sang-e-harifan

mai-o-mina se aafat Tal gai hai

main bahr-e-azmaish bhi jala hun

ki dekhun mujh mein kitni raushni hai

ilahi KHair ho in bastiyon ki

pas-e-diwar ek parchhain si hai

sawad-e-shahr mein koi bala hai

jo wahshat bin ke pichha kar rahi hai

hui phir sham phir din bhar ki shorish

gali-kuchon mein chhap kar so gai hai

kuchh aise so rahe hain shahr wale

ki ek muddat mein nind un ko mili hai

ye ghar sote ke sote hi na rah jaen

hawa-e-hashr-saman chal rahi hai

hui phir subh zaKHmon ke ufuq se

faza phir taza dam ho kar uThi hai

kisi qaidi ko phir KHwabon se uTh kar

kisi zanjir ne aawaz di hai

gharon se chand lamhon ki rifaqat

bichhaD kar shahr ki jaanib chali hai

lahu rista hai dast-e-shisha-gar se

faza aaina-KHana ban gai hai

phir apne daere qausen banae

wahi miTTi wahi kuza-gari hai

tum is se kya bachoge 'shauq'-sahab

ki qismat mein yahi gardish likhi hai