injil-e-raftagan ki hadison ke sath hun

injīl-e-raftagāñ kī hadīsoñ ke saath huuñ

īsā-nafas huuñ aur salīboñ ke saath huuñ

pāband-e-rañg-o-naqsh huuñ tasvīr kī tarah

maiñ be-hijāb apne hijāboñ ke saath huuñ

aurāq-e-ārzū pe ba-unvān-e-jāñ-kanī

maiñ be-nishāñ sī chand lakīroñ ke saath huuñ

shāyad ye intizār kī lau faisla kare

maiñ apne saath huuñ ki darīchoñ ke saath huuñ

tū fat.h-mand merā tarāshā huā sanam

maiñ but-tarāsh apnī shikastoñ ke saath huuñ

mauj-e-sabā kī zad pe sar-e-rahguzār-e-shauq

maiñ bhī 'nasīr' ghar ke charāġhoñ ke saath huuñ

injil-e-raftagan ki hadison ke sath hun

isa-nafas hun aur salibon ke sath hun

paband-e-rang-o-naqsh hun taswir ki tarah

main be-hijab apne hijabon ke sath hun

auraq-e-arzu pe ba-unwan-e-jaan-kani

main be-nishan si chand lakiron ke sath hun

shayad ye intizar ki lau faisla kare

main apne sath hun ki darichon ke sath hun

tu fath-mand mera tarasha hua sanam

main but-tarash apni shikaston ke sath hun

mauj-e-saba ki zad pe sar-e-rahguzar-e-shauq

main bhi 'nasir' ghar ke charaghon ke sath hun