insan hon to qaum ke gham-KHwar bhi rahen

insān hoñ to qaum ke ġham-ḳhvār bhī raheñ

zinda tamām logoñ ke kirdār bhī raheñ

sehat agar hai Thiik to bachche na ā.eñge

maañ baap ko ye chāhiye bīmār bhī raheñ

sab kī qalam se maañg hai le aa.e inqalāb

ab raushnā.ī meñ tirī añgār bhī raheñ

dariyā meñ jo bhī Duube ubarne na paa.e vo

lahroñ ke saath saath hī mañjdhār bhī raheñ

jin ko vatan se pyaar hai un se base ye mulk

kuchh log kah rahe haiñ ki ġhaddār bhī raheñ

hālāñki hādsoñ pe ikaTThā to hogī bhiiḌ

mumkin kahāñ hai in meñ madad-gār bhī raheñ

'sarītā' galī galī meñ to bāzār saj ga.e

sarkār chāhtī hai ḳharīdār bhī raheñ

insan hon to qaum ke gham-KHwar bhi rahen

zinda tamam logon ke kirdar bhi rahen

sehat agar hai Thik to bachche na aaenge

man bap ko ye chahiye bimar bhi rahen

sab ki qalam se mang hai le aae inqalab

ab raushnai mein teri angar bhi rahen

dariya mein jo bhi Dube ubarne na pae wo

lahron ke sath sath hi manjdhaar bhi rahen

jin ko watan se pyar hai un se base ye mulk

kuchh log kah rahe hain ki ghaddar bhi rahen

haalanki hadson pe ikaTTha to hogi bhiD

mumkin kahan hai in mein madad-gar bhi rahen

'sarita' gali gali mein to bazar saj gae

sarkar chahti hai KHaridar bhi rahen