insan ko milte hain nai baat ke patthar

insān ko milte haiñ na.ī baat ke patthar

Takrāte haiñ jis vaqt ḳhayālāt ke patthar

ehsās pe girte haiñ jo auqāt ke patthar

jazboñ ko kuchal dete haiñ hālāt ke patthar

jab pyaar kī rāhoñ meñ qadam us ne baḌhāyā

majnūñ ko bhī maare ga.e din raat ke patthar

ka.aba ho yā kāshī ho zarā ġhaur se dekho

azmat kī nishānī haiñ maqāmāt ke patthar

kyā ho gayā is daur ko arbāb-e-ḳhirad ko

paḌne lage aqloñ pe rivāyāt ke patthar

dīvāna jo guzrā hai kabhī terī galī se

maare use logoñ ne savālāt ke patthar

kyoñ kar na ho ā.īna-e-jazbāt shikasta

aa.e haiñ mire naam javābāt ke patthar

dil par mire us jān-e-vafā ne sar-e-mahfil

pheñke haiñ nigāhoñ se ishārāt ke patthar

mahfil meñ 'nigār' un ke liye maiñ ne tarāshe

alfāz kī shakloñ meñ ḳhayālāt ke patthar

insan ko milte hain nai baat ke patthar

Takraate hain jis waqt KHayalat ke patthar

ehsas pe girte hain jo auqat ke patthar

jazbon ko kuchal dete hain haalat ke patthar

jab pyar ki rahon mein qadam us ne baDhaya

majnun ko bhi mare gae din raat ke patthar

kaba ho ya kashi ho zara ghaur se dekho

azmat ki nishani hain maqamat ke patthar

kya ho gaya is daur ko arbab-e-KHirad ko

paDne lage aqlon pe riwayat ke patthar

diwana jo guzra hai kabhi teri gali se

mare use logon ne sawalat ke patthar

kyon kar na ho aaina-e-jazbaat shikasta

aae hain mere nam jawabaat ke patthar

dil par mere us jaan-e-wafa ne sar-e-mahfil

phenke hain nigahon se ishaaraat ke patthar

mahfil mein 'nigar' un ke liye main ne tarashe

alfaz ki shaklon mein KHayalat ke patthar