insan se insan ko nafrat nahin achchhi

insān se insān ko nafrat nahīñ achchhī

ehsān jatāne kī bhī aadat nahīñ achchhī

bhaa.ī kī burā.ī jo kiyā kartā hai har dam

har aise munāfiq kī mohabbat nahīñ achchhī

zillat ke sivā aur na kuchh us ko milegā

makkār-o-gunahgār kī sohbat nahīñ achchhī

kartā hai amānat meñ ḳhayānat jo sarāsar

har aise bashar se koī nisbat nahīñ achchhī

aa.e na kabhī kaam ġharīboñ ke to ai dost

ambār ho daulat kā vo daulat nahīñ achchhī

gulshan ke sañvarne meñ lahū ham ne diyā hai

haqdār-e-gulistāñ se baġhāvat nahīñ achchhī

insāf ġharīboñ ko jo munsif na dilā.e

ho aisī jahāñ par vo adālat nahīñ achchhī

'yāsīn' jo fitrat hai badaltī nahīñ lekin

hai vaqt badal jo tirī aadat nahīñ achchhī

insan se insan ko nafrat nahin achchhi

ehsan jatane ki bhi aadat nahin achchhi

bhai ki burai jo kiya karta hai har dam

har aise munafiq ki mohabbat nahin achchhi

zillat ke siwa aur na kuchh us ko milega

makkar-o-gunahgar ki sohbat nahin achchhi

karta hai amanat mein KHayanat jo sarasar

har aise bashar se koi nisbat nahin achchhi

aae na kabhi kaam gharibon ke to ai dost

ambar ho daulat ka wo daulat nahin achchhi

gulshan ke sanwarne mein lahu hum ne diya hai

haqdar-e-gulistan se baghawat nahin achchhi

insaf gharibon ko jo munsif na dilae

ho aisi jahan par wo adalat nahin achchhi

'yasin' jo fitrat hai badalti nahin lekin

hai waqt badal jo teri aadat nahin achchhi