intizar tha hum ko KHushnuma bahaaron ka

intizār thā ham ko ḳhushnumā bahāroñ kā

ye qusūr kyā kam hai ham qusūr-vāroñ kā

āftāb chehra thā jin sharāb-ḳhvāroñ kā

daaġh daaġh huliya hai un kā siyāhkāroñ kā

sa.ī-e-infirādī bhī naqsh chhoḌ jaatī hai

bujh gayā hai manzil tak naqsh rahguzāroñ kā

ek roz kho degā etimād-e-zātī bhī

aasrā takā jis ne dūsre sahāroñ kā

jis meñ shahd-lab hogā kal baḌā adab hogā

aaj nā-munāsib hai zikr māh-pāroñ kā

rahnumā-e-rah-rav meñ sham-e-bazm-e-ishrat ne

hasb-e-hāl paayā hai mudda.ā sitāroñ kā

aap hazrat-e-zāhid us se kuchh nahīñ kahte

'shād' bhī to sāthī hai ham gunāhgāroñ kā

intizar tha hum ko KHushnuma bahaaron ka

ye qusur kya kam hai hum qusur-waron ka

aaftab chehra tha jin sharab-KHwaron ka

dagh dagh huliya hai un ka siyahkaron ka

sai-e-infiradi bhi naqsh chhoD jati hai

bujh gaya hai manzil tak naqsh rahguzaron ka

ek roz kho dega etimad-e-zati bhi

aasra taka jis ne dusre sahaaron ka

jis mein shahd-lab hoga kal baDa adab hoga

aaj na-munasib hai zikr mah-paron ka

rahnuma-e-rah-raw mein sham-e-bazm-e-ishrat ne

hasb-e-haal paya hai muddaa sitaron ka

aap hazrat-e-zahid us se kuchh nahin kahte

'shad' bhi to sathi hai hum gunahgaron ka