is baat ko waise to chhupaya na gaya hai

is baat ko vaise to chhupāyā na gayā hai

sab ko ye magar raaz batāyā na gayā hai

parde kī kahānī hai ye parde kī zabānī

bas is liye parde ko uThāyā na gayā hai

haiñ bhed ka.ī ab bhī chhupe qaid rapaT meñ

kuchh naam the shāmil so dikhāyā na gayā hai

ambar kī ye sāzish hai ajab chāñd ke badle

duuje kisī sūraj ko ugāyā na gayā hai

harfoñ kī zabānī ho bayāñ kaise vo qissa

likkhā na gayā hai jo sunāyā na gayā hai

kuchh ahl-e-zabāñ aa.e to haiñ dene gavāhī

āñkhoñ se magar ḳhauf kā saayā na gayā hai

ye raat hai nārāz jo dekhā ki havā se

do ek charāġhoñ ko bujhāyā na gayā hai

is baat ko waise to chhupaya na gaya hai

sab ko ye magar raaz bataya na gaya hai

parde ki kahani hai ye parde ki zabani

bas is liye parde ko uThaya na gaya hai

hain bhed kai ab bhi chhupe qaid rapaT mein

kuchh nam the shamil so dikhaya na gaya hai

ambar ki ye sazish hai ajab chand ke badle

duje kisi suraj ko ugaya na gaya hai

harfon ki zabani ho bayan kaise wo qissa

likkha na gaya hai jo sunaya na gaya hai

kuchh ahl-e-zaban aae to hain dene gawahi

aankhon se magar KHauf ka saya na gaya hai

ye raat hai naraaz jo dekha ki hawa se

do ek charaghon ko bujhaya na gaya hai