is bahs mein kya paDna kise bhul gae hain

is bahs meñ kyā paḌnā kise bhuul ga.e haiñ

ham dasht meñ kab peḌ hue bhuul ga.e haiñ

kuchh qābil-e-rashk apnī mohabbat bhī nahīñ thī

kuchh shohrat-e-daurāñ se Dare bhuul ga.e haiñ

maiñ gard ko oḌhe hue muddat se paḌā huuñ

vo haath kahīñ rakh ke mujhe bhuul ga.e haiñ

asbāq tire yaad haiñ ehsān bhī saare

jā gardish-e-ayyām tujhe bhuul ga.e haiñ

ab zaḳhm ko taaza koī rakkhe bhī to kyūñkar

ab yaad bhī kyā karnā jise bhuul ga.e haiñ

ham lambī masāfat meñ kisī haath se chhūTe

ham log kahāñ kis ko mile bhuul ga.e haiñ

ham zang-zada qufl kī tamsīl the 'sābir'

kab kaise kisī dil meñ paḌe bhuul ga.e haiñ

is bahs mein kya paDna kise bhul gae hain

hum dasht mein kab peD hue bhul gae hain

kuchh qabil-e-rashk apni mohabbat bhi nahin thi

kuchh shohrat-e-dauran se Dare bhul gae hain

main gard ko oDhe hue muddat se paDa hun

wo hath kahin rakh ke mujhe bhul gae hain

asbaq tere yaad hain ehsan bhi sare

ja gardish-e-ayyam tujhe bhul gae hain

ab zaKHm ko taza koi rakkhe bhi to kyunkar

ab yaad bhi kya karna jise bhul gae hain

hum lambi masafat mein kisi hath se chhuTe

hum log kahan kis ko mile bhul gae hain

hum zang-zada qufl ki tamsil the 'sabir'

kab kaise kisi dil mein paDe bhul gae hain