is baras fasl-e-bahaaran ki tarah wapas aa

is baras fasl-e-bahārāñ kī tarah vāpas aa

to mirī jaan hai jānāñ kī tarah vāpas aa

muntazir kab se hai tāroñ kā samundar terā

shaam se shahr-e-nigārāñ kī tarah vāpas aa

is tarah aa ki añdheroñ meñ ujālā jaage

ek shab sham-e-farozāñ kī tarah vāpas aa

phuul ban jā.eñgī sūraj kī dahaktī kirneñ

dasht meñ rañg-e-gulistāñ kī tarah vāpas aa

is se pahle ki gurezāñ hoñ ye ḳhushbū lamhe

tū mire ahd-e-gurezāñ kī tarah vāpas aa

aa ki ham DhūñDh leñ ashkoñ meñ hañsī ke lamhe

tū bhī is gardish-e-daurāñ kī tarah vāpas aa

tujh pe lāzim hai vafāoñ kā bharam rakh lenā

bhūle-bisre kisī paimāñ kī tarah vāpas aa

kaun suntā hai vahāñ terī sadā.eñ 'mīnā'

apne ghar shahr-e-ḳhamoshāñ kī tarah vāpas aa

is baras fasl-e-bahaaran ki tarah wapas aa

to meri jaan hai jaanan ki tarah wapas aa

muntazir kab se hai taron ka samundar tera

sham se shahr-e-nigaran ki tarah wapas aa

is tarah aa ki andheron mein ujala jage

ek shab sham-e-farozan ki tarah wapas aa

phul ban jaengi suraj ki dahakti kirnen

dasht mein rang-e-gulistan ki tarah wapas aa

is se pahle ki gurezan hon ye KHushbu lamhe

tu mere ahd-e-gurezan ki tarah wapas aa

aa ki hum DhunDh len ashkon mein hansi ke lamhe

tu bhi is gardish-e-dauran ki tarah wapas aa

tujh pe lazim hai wafaon ka bharam rakh lena

bhule-bisre kisi paiman ki tarah wapas aa

kaun sunta hai wahan teri sadaen 'mina'

apne ghar shahr-e-KHamoshan ki tarah wapas aa