is chaman mein kabhi aise bhi bahaar aa jae

is chaman meñ kabhī aise bhī bahār aa jaa.e

be-qarārī ke muqaddar meñ qarār aa jaa.e

na diloñ meñ koī dhaḌkan hai na sīnoñ meñ taḌap

mauj-e-tūfāñ koī sāhil ba-kanār aa jaa.e

shāḳh par phuul ye kāñToñ se ubhar kar bolā

aaj sardār vahī jo sar-e-dār aa jaa.e

mar ke jiine meñ hai sarsabzī-e-gulzār kā raaz

phuul kumlā.e to kaliyoñ pe nikhār aa jaa.e

mahv-e-ā.īna huā kartā hai ā.īna-e-dil

jis qadar saaf karo utnā ġhubār aa jaa.e

be-qarārī meñ hī 'fayyāz' hai jiine kā maza

zindagī maut samajhiye jo qarār aa jaa.e

is chaman mein kabhi aise bhi bahaar aa jae

be-qarari ke muqaddar mein qarar aa jae

na dilon mein koi dhaDkan hai na sinon mein taDap

mauj-e-tufan koi sahil ba-kanar aa jae

shaKH par phul ye kanTon se ubhar kar bola

aaj sardar wahi jo sar-e-dar aa jae

mar ke jine mein hai sarsabzi-e-gulzar ka raaz

phul kumlae to kaliyon pe nikhaar aa jae

mahw-e-aina hua karta hai aaina-e-dil

jis qadar saf karo utna ghubar aa jae

be-qarari mein hi 'fayyaz' hai jine ka maza

zindagi maut samajhiye jo qarar aa jae