is dard-e-la-jawab se parhez kya karen

is dard-e-lā-javāb se parhez kyā kareñ

hotī nahīñ janāb se parhez kyā kareñ

ai tajrabāt-e-zindagī pahlā paḌāv hai

ġhaltī ke irtikāb se parhez kyā kareñ

ḳhud hī to dī haiñ ai ḳhudā duniyā kī lazzateñ

ham log dastiyāb se parhez kyā kareñ

muddat rahe haiñ yaar tirī justujū meñ ham

sahrā meñ haiñ sarāb se parhez kyā kareñ

jab zehn-o-dil meñ yaad kī taḳhtī lagī rahe

āñkheñ kisī ke ḳhvāb se parhez kyā kareñ

apnī kitāb-e-zīst kā unvān ishq hai

to phir junūñ ke baab se parhez kyā kareñ

har din nikal ke sāmne aatā hai āftāb

ham husn-e-be-hijāb se parhez kyā kareñ

'shīrāz' mānte haiñ ki aadat ḳharāb hai

par ādat-e-ḳharāb se parhez kyā kareñ

is dard-e-la-jawab se parhez kya karen

hoti nahin janab se parhez kya karen

ai tajrabaat-e-zindagi pahla paDaw hai

ghalti ke irtikab se parhez kya karen

KHud hi to di hain ai KHuda duniya ki lazzaten

hum log dastiyab se parhez kya karen

muddat rahe hain yar teri justuju mein hum

sahra mein hain sarab se parhez kya karen

jab zehn-o-dil mein yaad ki taKHti lagi rahe

aankhen kisi ke KHwab se parhez kya karen

apni kitab-e-zist ka unwan ishq hai

to phir junun ke bab se parhez kya karen

har din nikal ke samne aata hai aaftab

hum husn-e-be-hijab se parhez kya karen

'shiraaz' mante hain ki aadat KHarab hai

par aadat-e-KHarab se parhez kya karen