is dasht se aage bhi koi dasht-e-guman hai

is dasht se aage bhī koī dasht-e-gumāñ hai

lekin ye yaqīñ kaun dilā.egā kahāñ hai

ye ruuh kisī aur ilāqe kī makīñ hai

ye jism kisī aur jazīre kā makāñ hai

kartā hai vahī kaam jo karnā nahīñ hotā

jo baat maiñ kahtā huuñ ye dil suntā kahāñ hai

kashtī ke musāfir pe yūñhī taarī nahīñ ḳhauf

Thahrā huā paanī kisī ḳhatre kā nishāñ hai

jo kuchh bhī yahāñ hai tire hone se hai varna

manzar meñ jo khiltā hai vo manzar meñ kahāñ hai

is raakh se uThtī huī ḳhushbū ne batāyā

marte hue logoñ kī kahāñ jā-e-amāñ hai

ye kār-e-suḳhan kār-e-abas to nahīñ 'āmī'

ye qāfiya-paimā.ī nahīñ husn-e-bayāñ hai

is dasht se aage bhi koi dasht-e-guman hai

lekin ye yaqin kaun dilaega kahan hai

ye ruh kisi aur ilaqe ki makin hai

ye jism kisi aur jazire ka makan hai

karta hai wahi kaam jo karna nahin hota

jo baat main kahta hun ye dil sunta kahan hai

kashti ke musafir pe yunhi tari nahin KHauf

Thahra hua pani kisi KHatre ka nishan hai

jo kuchh bhi yahan hai tere hone se hai warna

manzar mein jo khilta hai wo manzar mein kahan hai

is rakh se uThti hui KHushbu ne bataya

marte hue logon ki kahan ja-e-aman hai

ye kar-e-suKHan kar-e-abas to nahin 'ami'

ye qafiya-paimai nahin husn-e-bayan hai