is daur mein bhi zalim-o-jabir ki tarah hain

is daur meñ bhī zālim-o-jābir kī tarah haiñ

kuchh log yahāñ shar ke 'anāsir kī tarah haiñ

kyā haal hai is shahr ke logoñ kā na pūchho

tapte hue sahrā ke musāfir kī tarah haiñ

kyā ham se ḳhatā ho ga.ī kyā jurm huā hai

kyoñ mulk meñ ham apne muhājir kī tarah haiñ

kal tak jo rahe zulm kī buniyād pe qaa.em

kuchh aise mahal aaj maqābir kī tarah haiñ

yādeñ bhī tirī dil meñ mire in dinoñ hamdam

haare hue lashkar ke manāzir kī tarah haiñ

ġham ho ki ḳhushī rakhtā huuñ siine se lagā kar

ye donoñ mire dil ke 'anāsir kī tarah haiñ

bas ek nazar meñ hī banā letī haiñ apnā

āñkheñ tirī bangāl ke sāhir kī tarah haiñ

ye aap kī marzī hai ki jo chāhe kareñ aap

duniyā meñ magar aap musāfir kī tarah haiñ

rishta ho koī us ko nibhāne meñ ai 'manzar'

is vaqt bhī ham apne akābir kī tarah haiñ

is daur mein bhi zalim-o-jabir ki tarah hain

kuchh log yahan shar ke 'anasir ki tarah hain

kya haal hai is shahr ke logon ka na puchho

tapte hue sahra ke musafir ki tarah hain

kya hum se KHata ho gai kya jurm hua hai

kyon mulk mein hum apne muhajir ki tarah hain

kal tak jo rahe zulm ki buniyaad pe qaem

kuchh aise mahal aaj maqabir ki tarah hain

yaaden bhi teri dil mein mere in dinon hamdam

haare hue lashkar ke manazir ki tarah hain

gham ho ki KHushi rakhta hun sine se laga kar

ye donon mere dil ke 'anasir ki tarah hain

bas ek nazar mein hi bana leti hain apna

aankhen teri bangal ke sahir ki tarah hain

ye aap ki marzi hai ki jo chahe karen aap

duniya mein magar aap musafir ki tarah hain

rishta ho koi us ko nibhane mein ai 'manzar'

is waqt bhi hum apne akabir ki tarah hain