is daur mein taufiq-e-ana di gai mujhko

is daur meñ taufīq-e-anā dī ga.ī mujh ko

kis jurm kī āḳhir ye sazā dī ga.ī mujh ko

maiñ ne jo kiyā fasl-e-bahārāñ kā taqāzā

ik phuul kī tasvīr dikhā dī ga.ī mujh ko

ye kaun mire naam ko dohrā sā rahā hai

shāyad kisī gumbad meñ sadā dī ga.ī mujh ko

vo un kā milānā mujhe ik sāhab-e-zar se

auqāt mirī yaad dilā dī ga.ī mujh ko

pahle to navāzā gayā maiñ ḳhil.at-e-ġham se

phir shahriyat-e-mulk-e-vafā dī ga.ī mujh ko

hairat hai ki is baar buzurgoñ kī taraf se

takmīl-e-mohabbat kī duā dī ga.ī mujh ko

kuchh naama likhe hī the abhī mere qalam ne

kāġhaz kī tarah aag lagā dī ga.ī mujh ko

gum ho gayā mastī meñ taḌapne kā maza bhī

kyā chiiz 'qatīl' aaj pilā dī ga.ī mujh ko

is daur mein taufiq-e-ana di gai mujh ko

kis jurm ki aaKHir ye saza di gai mujh ko

main ne jo kiya fasl-e-bahaaran ka taqaza

ek phul ki taswir dikha di gai mujh ko

ye kaun mere nam ko dohra sa raha hai

shayad kisi gumbad mein sada di gai mujh ko

wo un ka milana mujhe ek sahab-e-zar se

auqat meri yaad dila di gai mujh ko

pahle to nawaza gaya main KHilat-e-gham se

phir shahriyat-e-mulk-e-wafa di gai mujh ko

hairat hai ki is bar buzurgon ki taraf se

takmil-e-mohabbat ki dua di gai mujh ko

kuchh nama likhe hi the abhi mere qalam ne

kaghaz ki tarah aag laga di gai mujh ko

gum ho gaya masti mein taDapne ka maza bhi

kya chiz 'qatil' aaj pila di gai mujh ko