is gulshan-e-pur-Khaar se manind-e-saba bhag

is gulshan-e-pur-ḳhār se mānind-e-sabā bhaag

vahshat yahī kahtī hai ki zanjīr tuḌā bhaag

girte the ḳharīdār kab is tarah se us par

paañv se tire lagte hī mehñdī ko lagā bhaag

shoḳhī kahūñ kyā tere tasavvur kī ki he he

shab sāmne aa kar mire aage se gayā bhaag

jab kabk-e-darī dekhe hai raftār ko us kī

kahtā hai yahī jī meñ ''ye raftār uḌā bhāg''

zāhid jo huā kar ke vuzū hauz pe qaa.em

ik rind ko sūjhī ki tū ab us ko girā bhaag

Thahrā jo zarā bahr-e-mohabbat pe maiñ jā kar

aa.ī lab-e-sāhil se yahī us ke sadā bhaag

ai 'mus.hafī' hai mār-e-falak rahzan-e-mardum

tū bhaag sake us se to az-bahr-e-ḳhudā bhaag

is gulshan-e-pur-KHar se manind-e-saba bhag

wahshat yahi kahti hai ki zanjir tuDa bhag

girte the KHaridar kab is tarah se us par

panw se tere lagte hi mehndi ko laga bhag

shoKHi kahun kya tere tasawwur ki ki he he

shab samne aa kar mere aage se gaya bhag

jab kabk-e-dari dekhe hai raftar ko us ki

kahta hai yahi ji mein ye raftar uDa bhag

zahid jo hua kar ke wuzu hauz pe qaem

ek rind ko sujhi ki tu ab us ko gira bhag

Thahra jo zara bahr-e-mohabbat pe main ja kar

aai lab-e-sahil se yahi us ke sada bhag

ai 'mushafi' hai mar-e-falak rahzan-e-mardum

tu bhag sake us se to az-bahr-e-KHuda bhag