isko judai kaise kamalat kar gai

is kī judā.ī kaise kamālāt kar ga.ī

vo ḳhvāb ban ke mujh se mulāqāt kar ga.ī

dekhā use jo maiñ ne to kuchh bhī na sun sakā

kyā baat kar rahī thī vo kyā baat kar ga.ī

nādīda manziloñ ke liye rāstoñ kī dhuul

jab kahkashāñ banī to karāmāt kar ga.ī

rātoñ se chhīn kar vo charāġhoñ kī raushnī

jab sub.h ho ga.ī to use raat kar ga.ī

hadd-e-adab meñ yuuñ to mare sil ga.e the hoñT

ik ḳhāmushī bhī kitne savālāt kar ga.ī

phir is ke ba.ad merī samā.at hī kho ga.ī

kānoñ meñ mere jaane vo kyā baat kar ga.ī

āñkhoñ meñ kuchh namī to hamesha rahī hai 'shād'

āñkhoñ kī us namī ko vo barsāt kar ga.ī

is ki judai kaise kamalat kar gai

wo KHwab ban ke mujh se mulaqat kar gai

dekha use jo main ne to kuchh bhi na sun saka

kya baat kar rahi thi wo kya baat kar gai

nadida manzilon ke liye raston ki dhul

jab kahkashan bani to karamat kar gai

raaton se chhin kar wo charaghon ki raushni

jab subh ho gai to use raat kar gai

hadd-e-adab mein yun to mare sil gae the honT

ek KHamushi bhi kitne sawalat kar gai

phir is ke baad meri samaat hi kho gai

kanon mein mere jaane wo kya baat kar gai

aankhon mein kuchh nami to hamesha rahi hai 'shad'

aankhon ki us nami ko wo barsat kar gai