is latāfat se navā-pardāz honā chāhiye
soz ke parde meñ pinhāñ saaz honā chāhiye
yuuñ taḳhayyul ko falak-parvāz honā chāhiye
bāryāb-e-jalva-gāh-e-nāz honā chāhiye
chhā rahā hai bazm-e-ālam par sukūt-e-nāravā
ik ishāra ai nigāh-e-nāz honā chāhiye
is tarah kahiye fasāna rabt-e-husn-o-ishq kā
har-nafas sarmāya-dār-e-rāz honā chāhiye
aaj aatā hai zabāñ par qissa-e-mehr-o-vafā
ahl-e-dil ko gosh-bar-āvāz honā chāhiye
husn-e-kāfir-sāz hai ġhārat-gar-e-duniyā-o-dīñ
ishq-e-haq-āgāh ko dam-sāz honā chāhiye
lā.eq-e-sad-nāz hai 'nayyar' niyāz-e-āshiqī
apnī qismat par mujhe bhī naaz honā chāhiye
is latafat se nawa-pardaz hona chahiye
soz ke parde mein pinhan saz hona chahiye
yun taKHayyul ko falak-parwaz hona chahiye
baryab-e-jalwa-gah-e-naz hona chahiye
chha raha hai bazm-e-alam par sukut-e-narawa
ek ishaara ai nigah-e-naz hona chahiye
is tarah kahiye fasana rabt-e-husn-o-ishq ka
har-nafas sarmaya-dar-e-raaz hona chahiye
aaj aata hai zaban par qissa-e-mehr-o-wafa
ahl-e-dil ko gosh-bar-awaz hona chahiye
husn-e-kafir-saz hai ghaarat-gar-e-duniya-o-din
ishq-e-haq-agah ko dam-saz hona chahiye
laeq-e-sad-naz hai 'nayyar' niyaz-e-ashiqi
apni qismat par mujhe bhi naz hona chahiye
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.