is miTTi ko aise khel khilaya humne

is miTTī ko aise khel khilāyā ham ne

ḳhud ko roz bigāḌā roz banāyā ham ne

jo sochā thā vo to ham se banā nahīñ phir

jo ban paayā us se jī bahlāyā ham ne

ġham ko phir se tanhā.ī ke saath meñ mil kar

hañste hañste bātoñ meñ uljhāyā ham ne

nā-mumkin thā is ko hāsil karnā phir bhī

puurī shiddat se ye ishq nibhāyā ham ne

us kī yādeñ bojh na ban jaa.eñ sāñsoñ par

so yādoñ se apnā dil dhaḌkāyā ham ne

kah dete to shāyad achchhe ho jaate par

ḳhāmoshī se apnā maraz baḌhāyā ham ne

us kā chehra dekh liyā thā ek dafa phir

in āñkhoñ se sāloñ qarz chukāyā ham ne

is miTTi ko aise khel khilaya hum ne

KHud ko roz bigaDa roz banaya hum ne

jo socha tha wo to hum se bana nahin phir

jo ban paya us se ji bahlaya hum ne

gham ko phir se tanhai ke sath mein mil kar

hanste hanste baaton mein uljhaya hum ne

na-mumkin tha is ko hasil karna phir bhi

puri shiddat se ye ishq nibhaya hum ne

us ki yaaden bojh na ban jaen sanson par

so yaadon se apna dil dhaDkaya hum ne

kah dete to shayad achchhe ho jate par

KHamoshi se apna maraz baDhaya hum ne

us ka chehra dekh liya tha ek dafa phir

in aankhon se salon qarz chukaya hum ne