is naznin ki baaten kya pyari pyariyan hain

is nāznīñ kī bāteñ kyā pyārī pyāriyāñ haiñ

palkeñ haiñ jis kī chhuriyāñ āñkheñ kaTāriyāñ haiñ

is baat par bhalā ham kyūñkar na zahr khāveñ

ham se vahī rukāvaT ġhairoñ se yāriyāñ haiñ

Tuk safha-e-zamīñ ke ḳhāke pe ġhaur kar tū

sān.e.a ne is pe kyā kyā shakleñ utāriyāñ haiñ

dil kī tapish kā apnī aalam hī kuchh judā hai

sīmāb o barq meñ kab ye be-qarāriyāñ haiñ

un mahmaloñ pe aave majnūñ ko kyuuñ na hasrat

jin mahmaloñ ke andar do do svāriyāñ haiñ

jaagā hai raat pyāre tū kis ke ghar jo terī

palkeñ nadīdiyāñ haiñ āñkheñ ḳhumāriyāñ haiñ

naumīd haiñ ba-zāhir go vasl se ham us ke

dil meñ to sau tarah kī ummidvāriyāñ haiñ

kyā pūchhtā hai hamdam ahvāl 'mus.hafī' kā

rāteñ añdheriyāñ aur aḳhtar-shumāriyāñ haiñ

is naznin ki baaten kya pyari pyariyan hain

palken hain jis ki chhuriyan aankhen kaTariyan hain

is baat par bhala hum kyunkar na zahr khawen

hum se wahi rukawaT ghairon se yariyan hain

Tuk safha-e-zamin ke KHake pe ghaur kar tu

sanea ne is pe kya kya shaklen utariyan hain

dil ki tapish ka apni aalam hi kuchh juda hai

simab o barq mein kab ye be-qarariyan hain

un mahmalon pe aawe majnun ko kyun na hasrat

jin mahmalon ke andar do do swariyan hain

jaga hai raat pyare tu kis ke ghar jo teri

palken nadidiyan hain aankhen KHumariyan hain

naumid hain ba-zahir go wasl se hum us ke

dil mein to sau tarah ki ummidwariyan hain

kya puchhta hai hamdam ahwal 'mushafi' ka

raaten andheriyan aur aKHtar-shumariyan hain