is pari ne tumhein baalon mein sajaya phulo

is parī ne tumheñ bāloñ meñ sajāyā phūlo

phūlne vaalo ravā hai tumheñ jitnā phūlo

duur kyoñ jaate ho āñkhoñ se hasīñ chehro tum

titliyāñ to haiñ tumheñ dekh ke zinda phūlo

ḳhāk-e-ġhurbat pe tamannā.eñ nahīñ ug saktīñ

dil hai vīrān to vīrān rahegā phūlo

vāpas auqāt meñ aanā ho to dam ghuTne lage

ik ḳhushī milne kā matlab thā ki itnā phūlo

ab ke sajne lagīñ zulfoñ ke bajā.e qabreñ

aisī rut meñ na kisī shāḳh pe khilnā phūlo

har koī dekh ke maalī ko duā dene lage

ai mire dosto aisā phalo aisā phūlo

sharm se surḳh hue jaate ho us ke aage

maiñ na kahtā thā nazākat vo hai dekhā phūlo

us sitamgar ke masalne se shanāsā nahīñ tum

mat kisī bhuul meñ rahnā na mahaknā phūlo

is pari ne tumhein baalon mein sajaya phulo

phulne walo rawa hai tumhein jitna phulo

dur kyon jate ho aankhon se hasin chehro tum

titliyan to hain tumhein dekh ke zinda phulo

KHak-e-ghurbat pe tamannaen nahin ug saktin

dil hai viran to viran rahega phulo

wapas auqat mein aana ho to dam ghuTne lage

ek KHushi milne ka matlab tha ki itna phulo

ab ke sajne lagin zulfon ke bajae qabren

aisi rut mein na kisi shaKH pe khilna phulo

har koi dekh ke mali ko dua dene lage

ai mere dosto aisa phalo aisa phulo

sharm se surKH hue jate ho us ke aage

main na kahta tha nazakat wo hai dekha phulo

us sitamgar ke masalne se shanasa nahin tum

mat kisi bhul mein rahna na mahakna phulo