is qadar mashghul the ek ru-e-taban ki taraf

is qadar mashġhūl the ik rū-e-tābāñ kī taraf

ham ne dekhā hī nahīñ is chāk-e-dāmāñ kī taraf

jab muqaddar meñ añdherā likh diyā tū ne ḳhudā

kaun dekhegā batā sham-e-farozāñ kī taraf

ham bhī terī hī mohabbat meñ yahāñ tak aa.e haiñ

aur terī sab tavajjoh ek mehmāñ kī taraf

phir huā yuuñ ham ne us se pher lī nazreñ tamām

kab talak ham dekhte us āfat-e-jāñ kī taraf

un kī har ik baat kā aisā asar mujh par huā

ruk ga.iiñ nazreñ mirī shahr-e-nigārāñ kī taraf

is qadar mashghul the ek ru-e-taban ki taraf

hum ne dekha hi nahin is chaak-e-daman ki taraf

jab muqaddar mein andhera likh diya tu ne KHuda

kaun dekhega bata sham-e-farozan ki taraf

hum bhi teri hi mohabbat mein yahan tak aae hain

aur teri sab tawajjoh ek mehman ki taraf

phir hua yun hum ne us se pher li nazren tamam

kab talak hum dekhte us aafat-e-jaan ki taraf

un ki har ek baat ka aisa asar mujh par hua

ruk gain nazren meri shahr-e-nigaran ki taraf