is samt to mahaul hai pahle se hi bigDa hua

is samt to māhaul hai pahle se hī bigḌā huā

ai ātishīñ tūfān terā kyoñ idhar aanā huā

va.ada thā us kā vo na aayā haañ magar aisā huā

ik phuul sāhil par nazar aayā mujhe rakkhā huā

kis ne qadam rakkhe yahāñ kis kā idhar pherā huā

ḳhushbū se kis ke jism kī ghar hai mirā mahkā huā

ik abr ke TukḌe ne mere sar pe khīñchā sā.ebāñ

jab dhuup ke saffāk sahrā se guzar merā huā

kāñToñ kī sūrat phuul bhī piite haiñ is jānib lahū

koī nahīñ hai saath mere ye bahut achchhā huā

ḳhālī paḌā hai ik zamāne se ye ghar lekin mujhe

mahsūs hotā hai darīche meñ koī baiThā huā

paanī kā ik qatra na thā maujeñ na thiiñ sāhil na thā

dekhā hai maiñ ne dasht meñ dariyā ajab bahtā huā

kal mere kamre meñ koī thā aur bhī mere sivā

maiñ ne jo pūchhā kaun hai pur-shor sannāTā huā

ye dekhtā maiñ aa rahā huuñ ek muddat se 'mujīb'

āvāz jab maiñ ne lagā.ī band darvāza huā

is samt to mahaul hai pahle se hi bigDa hua

ai aatishin tufan tera kyon idhar aana hua

wada tha us ka wo na aaya han magar aisa hua

ek phul sahil par nazar aaya mujhe rakkha hua

kis ne qadam rakkhe yahan kis ka idhar phera hua

KHushbu se kis ke jism ki ghar hai mera mahka hua

ek abr ke TukDe ne mere sar pe khincha saeban

jab dhup ke saffak sahra se guzar mera hua

kanTon ki surat phul bhi pite hain is jaanib lahu

koi nahin hai sath mere ye bahut achchha hua

KHali paDa hai ek zamane se ye ghar lekin mujhe

mahsus hota hai dariche mein koi baiTha hua

pani ka ek qatra na tha maujen na thin sahil na tha

dekha hai main ne dasht mein dariya ajab bahta hua

kal mere kamre mein koi tha aur bhi mere siwa

main ne jo puchha kaun hai pur-shor sannaTa hua

ye dekhta main aa raha hun ek muddat se 'mujib'

aawaz jab main ne lagai band darwaza hua