is sarasimgi mein baat karen to kaise

is sarāsīmgī meñ baat kareñ to kaise

shahsavāroñ se musāvāt kareñ to kaise

ḳhauf se ḳhushk hue jaate haiñ lab-e-lālīñ

log iz.hār-e-ḳhayālāt kareñ to kaise

phir rahe tā.ir-e-majnūñ haiñ kū-ba-kū dar dar

ishq-e-sādiq kā vo isbāt kareñ to kaise

bad nahīñ garche vo badnām magar haiñ har sū

aisī sūrat meñ mulāqāt kareñ to kaise

har ghaḌī sochte rahte haiñ tahī-dast ki ham

misl-e-hātim-tā.ī ḳhairāt kareñ to kaise

aap hī apnā bad-andesh-o-mudda.ī ban kar

apnī hastī ko past-o-māt kareñ to kaise

ḳhair-andesh haiñ maanā ki shanāvar lekin

mauj-e-hastī se do do haath kareñ to kaise

ḳhurd bachchoñ kī tamannā hai ye 'abrār' ki bas

band muTThī meñ ye din raat kareñ to kaise

is sarasimgi mein baat karen to kaise

shahsawaron se musawat karen to kaise

KHauf se KHushk hue jate hain lab-e-lalin

log izhaar-e-KHayalat karen to kaise

phir rahe tair-e-majnun hain ku-ba-ku dar dar

ishq-e-sadiq ka wo isbaat karen to kaise

bad nahin garche wo badnam magar hain har su

aisi surat mein mulaqat karen to kaise

har ghaDi sochte rahte hain tahi-dast ki hum

misl-e-hatim-tai KHairaat karen to kaise

aap hi apna bad-andesh-o-muddai ban kar

apni hasti ko past-o-mat karen to kaise

KHair-andesh hain mana ki shanawar lekin

mauj-e-hasti se do do hath karen to kaise

KHurd bachchon ki tamanna hai ye 'abrar' ki bas

band muTThi mein ye din raat karen to kaise