is se pahle ki bichhaDne ka irada kar len

is se pahle ki bichhaḌne kā irāda kar leñ

aao ham zikr mohabbat kā ziyāda kar leñ

bin piye bhī to shab-e-hijr guzar saktī hai

kyā zarūrī hai ki sar tohmat-e-bāda kar leñ

ye bhī ho saktā hai vo ḳhud meñ simaT kar aa.eñ

ham bhī mumkin hai ki āġhosh kushāda kar leñ

ham ko malbūs-e-sukūnat to nahīñ hogā nasīb

rāste kī hī thakan tan kā labāda kar leñ

ham faqīroñ ko jahāñ vāloñ ne samjhā kyā hai

bādshāhoñ ko bhī chāheñ to piyāda kar leñ

mujh ko us haath pe dil rakhnā thā maiñ rakh aayā

ab vo chāheñ to mire dil kā burāda kar leñ

is se pahle ki bichhaDne ka irada kar len

aao hum zikr mohabbat ka ziyaada kar len

bin piye bhi to shab-e-hijr guzar sakti hai

kya zaruri hai ki sar tohmat-e-baada kar len

ye bhi ho sakta hai wo KHud mein simaT kar aaen

hum bhi mumkin hai ki aaghosh kushada kar len

hum ko malbus-e-sukunat to nahin hoga nasib

raste ki hi thakan tan ka labaada kar len

hum faqiron ko jahan walon ne samjha kya hai

baadshahon ko bhi chahen to piyaada kar len

mujh ko us hath pe dil rakhna tha main rakh aaya

ab wo chahen to mere dil ka burada kar len