is se pahle ki teri mujh pe ata ho jae

is se pahle ki tirī mujh pe 'atā ho jaa.e

ye bhī mumkin hai koī mujh se ḳhatā ho jaa.e

mujh ko is vasl ke lālach se bachā kar rakhnā

ho na aisā ki mirā 'ishq fanā ho jaa.e

baat aisī na kaho talḳh ki mere dil kā

mundamil zaḳhm koī phir se harā ho jaa.e

gar tirā dast-e-masīhā.ī mayassar ho mujhe

dam-e-āḳhir hī sahī mujh ko shifā ho jaa.e

us jagah haar yazīdoñ kā muqaddar hotī

maiñ ne dekhā hai jahāñ karb-o-balā ho jaa.e

ek muddat se maiñ chup-chāp paḌā huuñ ab to

ai hasīñ shaḳhs mujhe izn-e-navā ho jaa.e

ḳhauf aatā hai baḌā habs kī shiddat se mujhe

ho na aisā koī tūfān khaḌā ho jaa.e

jitnī shiddat se use chāhā hai maiñ ne 'arshad'

'ain mumkin hai ki vo shaḳhs ḳhudā ho jaa.e

is se pahle ki teri mujh pe 'ata ho jae

ye bhi mumkin hai koi mujh se KHata ho jae

mujh ko is wasl ke lalach se bacha kar rakhna

ho na aisa ki mera 'ishq fana ho jae

baat aisi na kaho talKH ki mere dil ka

mundamil zaKHm koi phir se hara ho jae

gar tera dast-e-masihai mayassar ho mujhe

dam-e-aKHir hi sahi mujh ko shifa ho jae

us jagah haar yazidon ka muqaddar hoti

main ne dekha hai jahan karb-o-bala ho jae

ek muddat se main chup-chap paDa hun ab to

ai hasin shaKHs mujhe izn-e-nawa ho jae

KHauf aata hai baDa habs ki shiddat se mujhe

ho na aisa koi tufan khaDa ho jae

jitni shiddat se use chaha hai main ne 'arshad'

'ain mumkin hai ki wo shaKHs KHuda ho jae