is tarah ahd-e-tamanna ko guzare jaiye

is tarah ahd-e-tamannā ko guzāre jā.iye

un ko ḳhāmoshī ke lahje meñ pukāre jā.iye

ishq kā mansab nahīñ āvāza-e-lafz-o-bayāñ

āñkhoñ hī āñkhoñ meñ har ik shikva guzāre jā.iye

dekhiye rusvā na ho jaa.e kahīñ rasm-e-junūñ

apne dīvāne ko ik patthar to maare jā.iye

aa.ine pe jo guzarnā ho guzar jaa.e magar

aap yūñhī zulf-e-barham ko sañvāre jā.iye

jazba-e-dil kā taqāzā hai ki baazī jiit luuñ

ehtiyāt-e-ishq kahtī hai ki haare jā.iye

ho sake to dil kī hālat ḳhud hī aa kar dekhiye

ġhair kī suniye na kahne par hamāre jā.iye

kuchh to lutf-e-lams-e-āġhosh-e-talātum chāhiye

tā-kujā 'aḳhgar' kināre hī kināre jā.iye

is tarah ahd-e-tamanna ko guzare jaiye

un ko KHamoshi ke lahje mein pukare jaiye

ishq ka mansab nahin aawaza-e-lafz-o-bayan

aankhon hi aankhon mein har ek shikwa guzare jaiye

dekhiye ruswa na ho jae kahin rasm-e-junun

apne diwane ko ek patthar to mare jaiye

aaine pe jo guzarna ho guzar jae magar

aap yunhi zulf-e-barham ko sanware jaiye

jazba-e-dil ka taqaza hai ki bazi jit lun

ehtiyat-e-ishq kahti hai ki haare jaiye

ho sake to dil ki haalat KHud hi aa kar dekhiye

ghair ki suniye na kahne par hamare jaiye

kuchh to lutf-e-lams-e-aghosh-e-talatum chahiye

ta-kuja 'aKHgar' kinare hi kinare jaiye