is tarah chhoD ke jaane ko mujhe tu ne kaha

is tarah chhoḌ ke jaane ko mujhe tū ne kahā

jaise ye tū ne nahīñ phuul se ḳhushbū ne kahā

raat se kahnā ki ghabrā.e nahīñ ham haiñ naañ

dhund meñ Duubī huī shaam se jugnū ne kahā

itnā rotī hai to jā kaun rahegā tujh meñ

Tuut kar girte hue aañkh se aañsū ne kahā

mere shā'ir ko akelā na samajh ai duniyā

chalte chalte kisī parchhā.īñ ke baazū ne kahā

aise mat dekho ki phir dekh na paao kuchh bhī

merī nazroñ se tire husn ke jaadū ne kahā

bojh kyoñ dil pe liye sotā hai sone vaale

khul ga.ī aañkh to baniye se tarāzū ne kahā

terī masjid mire mandir meñ vahī rahtā hai

ek mullā se gale mil ke ye sādhū ne kahā

'ishq kar 'ishq mire dil se kahā dhaḌkan ne

raqs kar raqs mire paañv se ghuñghrū ne kahā

is tarah chhoD ke jaane ko mujhe tu ne kaha

jaise ye tu ne nahin phul se KHushbu ne kaha

raat se kahna ki ghabrae nahin hum hain nan

dhund mein Dubi hui sham se jugnu ne kaha

itna roti hai to ja kaun rahega tujh mein

Tut kar girte hue aankh se aansu ne kaha

mere sha'ir ko akela na samajh ai duniya

chalte chalte kisi parchhain ke bazu ne kaha

aise mat dekho ki phir dekh na pao kuchh bhi

meri nazron se tere husn ke jadu ne kaha

bojh kyon dil pe liye sota hai sone wale

khul gai aankh to baniye se taraazu ne kaha

teri masjid mere mandir mein wahi rahta hai

ek mulla se gale mil ke ye sadhu ne kaha

'ishq kar 'ishq mere dil se kaha dhaDkan ne

raqs kar raqs mere panw se ghunghru ne kaha