is tarah dhaDakta hai koi dil mere dil mein

is tarah dhaḌaktā hai koī dil mire dil meñ

ho jaise mirā madd-e-muqābil mire dil meñ

hāthoñ se tire ġham kā sirā chhūT rahā hai

yā Duub rahā hai koī sāhil mire dil meñ

rahnā thā mire dil meñ kisī ġhuncha-dahan ko

aur bas gayā ik shor-e-salāsil mire dil meñ

lipTe rahe ik chāñd ke dāman se kinā.e

ik dard se hotī rahī jhilmil mire dil meñ

ik ishq thā ab raakh huā ḳhud nagrī meñ

ab kuchh bhī nahīñ hai tire qābil mire dil meñ

kuchh din se mirā haal ajab hai ki rafīqo

aañsū bhī Thahartā hai ba-mushkil mire dil meñ

is tarah dhaDakta hai koi dil mere dil mein

ho jaise mera madd-e-muqabil mere dil mein

hathon se tere gham ka sira chhuT raha hai

ya Dub raha hai koi sahil mere dil mein

rahna tha mere dil mein kisi ghuncha-dahan ko

aur bas gaya ek shor-e-salasil mere dil mein

lipTe rahe ek chand ke daman se kinae

ek dard se hoti rahi jhilmil mere dil mein

ek ishq tha ab rakh hua KHud nagri mein

ab kuchh bhi nahin hai tere qabil mere dil mein

kuchh din se mera haal ajab hai ki rafiqo

aansu bhi Thaharta hai ba-mushkil mere dil mein