is tarah har ek gunah ka samna karna paDa

is tarah har ik gunāh kā sāmnā karnā paḌā

hashr meñ ḳhud ke kiye par tabsira karnā paḌā

sulh phir apne hī dil se yuuñ hameñ karnī paḌī

faisle ko Tālne kā faisla karnā paḌā

kāmyābī kī ḳhushī meñ chīḳhtā hai ik malāl

soch kar nikle the kyā kuchh aur kyā karnā paḌā

ek muddat se ka.ī chehre the āñkhoñ meñ asiir

āñsuoñ kī shakl meñ sab ko rihā karnā paḌā

jhuuT ke naqqār-ḳhāne meñ balā kā shor hai

sach kī shahnā.ī ko sun kar an-sunā karnā paḌā

aa gayā thā ek baar us kī tilismī bātoñ meñ

zehn ko phir 'umr-bhar dil kā kahā karnā paḌā

jab sabhī patthar ḳhudā hone pe āmāda mile

pattharoñ meñ 'nūr' ḳhud ko aa.ina karnā paḌā

is tarah har ek gunah ka samna karna paDa

hashr mein KHud ke kiye par tabsira karna paDa

sulh phir apne hi dil se yun hamein karni paDi

faisle ko Talne ka faisla karna paDa

kaamyabi ki KHushi mein chiKHta hai ek malal

soch kar nikle the kya kuchh aur kya karna paDa

ek muddat se kai chehre the aankhon mein asir

aansuon ki shakl mein sab ko riha karna paDa

jhuT ke naqqar-KHane mein bala ka shor hai

sach ki shahnai ko sun kar an-suna karna paDa

aa gaya tha ek bar us ki tilismi baaton mein

zehn ko phir 'umr-bhar dil ka kaha karna paDa

jab sabhi patthar KHuda hone pe aamada mile

pattharon mein 'nur' KHud ko aaina karna paDa