is tarah pahle to ghar se main kabhi nikla na tha

is tarah pahle to ghar se maiñ kabhī niklā na thā

dhuup thī chāroñ taraf mere kahīñ saaya na thā

maiñ ThiThur kar rah gayā huuñ sard mausam ke tale

varna jangal meñ shajar mujh se koī ūñchā na thā

sach to ye hai dostoñ ko muskurāhaT thī pasand

shiddat-e-ranj-o-alam meñ is liye royā na thā

pesh koī hādisa aayā ki manzil aa ga.ī

dil achānak raah meñ aise kabhī dhaḌkā na thā

ghūmtī hai apne markaz par sunā to hai 'razā'

ham ne duniyā ko alag ho kar kabhī dekhā na thā

is tarah pahle to ghar se main kabhi nikla na tha

dhup thi chaaron taraf mere kahin saya na tha

main ThiThur kar rah gaya hun sard mausam ke tale

warna jangal mein shajar mujh se koi uncha na tha

sach to ye hai doston ko muskurahaT thi pasand

shiddat-e-ranj-o-alam mein is liye roya na tha

pesh koi hadisa aaya ki manzil aa gai

dil achanak rah mein aise kabhi dhaDka na tha

ghumti hai apne markaz par suna to hai 'raza'

hum ne duniya ko alag ho kar kabhi dekha na tha