is tarah rasm mohabbat ki ada hoti hai

is tarah rasm mohabbat kī adā hotī hai

aaj se terī mirī raah judā hotī hai

maiñ kisī aur hī duniyā meñ pahuñch jaatā huuñ

jab bhī kānoñ meñ azānoñ kī sadā hotī hai

bad-duā koī agar de to burā mat maano

bad-duā bhī to mirī jaan duā hotī hai

niiñd ke saath hī ik baab nayā khultā hai

ḳhvāb ke TūTne juḌne kī kathā hotī hai

jism kī vādiyoñ meñ rah ke ye jaanā maiñ ne

jism kī pyaas to ghanghor ghaTā hotī hai

maiñ tujhe chhoḌ ke hargiz nahīñ jaane vaalā

ai mirī jaan tū be-vaj.h ḳhafā hotī hai

do javāñ dil jo mohabbat meñ kabhī paḌ jaa.eñ

kyā ye sach-much meñ ḳhudā kī hī ḳhatā hotī hai

is tarah rasm mohabbat ki ada hoti hai

aaj se teri meri rah juda hoti hai

main kisi aur hi duniya mein pahunch jata hun

jab bhi kanon mein azanon ki sada hoti hai

bad-dua koi agar de to bura mat mano

bad-dua bhi to meri jaan dua hoti hai

nind ke sath hi ek bab naya khulta hai

KHwab ke TuTne juDne ki katha hoti hai

jism ki wadiyon mein rah ke ye jaana main ne

jism ki pyas to ghanghor ghaTa hoti hai

main tujhe chhoD ke hargiz nahin jaane wala

ai meri jaan tu be-wajh KHafa hoti hai

do jawan dil jo mohabbat mein kabhi paD jaen

kya ye sach-much mein KHuda ki hi KHata hoti hai