is zamin par us ka maskan us ka ghar lagta na tha

is zamīñ par us kā maskan us kā ghar lagtā na thā

is qadar vo ḳhūbsūrat thā bashar lagtā na thā

hijr kā maqtal ho yā suulī visāl-e-yār kī

ik zamāna thā kisī se koī Dar lagtā na thā

jis qadar maiñ thak gayā thā us ko tai karte hue

dekhne meñ is qadar lambā safar lagtā na thā

duur mujh se kar diyā kitnā anāoñ ne use

mere shānoñ par lagā merā hī sar lagtā na thā

kar rahā thā jis tarah sachchī mohabbat kī talāsh

aane vaale mausamoñ se be-ḳhabar lagtā na thā

vo to us ne chhū liyā ik din mohabbat se mujhe

varna mujh par phuul khilte the samar lagtā na thā

jis qadar badnām thā shahr-e-vafā meñ vo 'na.īm'

bevafā pahlī nazar meñ us qadar lagtā na thā

is zamin par us ka maskan us ka ghar lagta na tha

is qadar wo KHubsurat tha bashar lagta na tha

hijr ka maqtal ho ya suli visal-e-yar ki

ek zamana tha kisi se koi Dar lagta na tha

jis qadar main thak gaya tha us ko tai karte hue

dekhne mein is qadar lamba safar lagta na tha

dur mujh se kar diya kitna anaon ne use

mere shanon par laga mera hi sar lagta na tha

kar raha tha jis tarah sachchi mohabbat ki talash

aane wale mausamon se be-KHabar lagta na tha

wo to us ne chhu liya ek din mohabbat se mujhe

warna mujh par phul khilte the samar lagta na tha

jis qadar badnam tha shahr-e-wafa mein wo 'naim'

bewafa pahli nazar mein us qadar lagta na tha