is zindagi se ek laDai laDa hun main

is zindagī se ek laḌā.ī laḌā huuñ maiñ

tab jā ke is maqām pe aa kar khaḌā huuñ maiñ

merī anā se mujh ko ijāzat nahīñ milī

aur vo samajh rahe haiñ ki zid par aḌā huuñ maiñ

qad kā nahīñ baḌā pe jasārat to dekhiye

kitne baḌe baḌoñ ke barābar khaḌā huuñ maiñ

ab zimmadāriyoñ kī sazā jhelnī paḌe

merā qusūr ye hai ki ghar meñ baḌā huuñ maiñ

apne pidar ke hukm kī ta.amīl na karūñ

huuñ maiñ baḌā magar kahāñ itnā baḌā huuñ maiñ

haiñ aap jauharī to parakhnā hai aap ko

apne har ek sher meñ motī jaḌā huuñ maiñ

duniyā zarūriyāt ko puurā bhī kar chukī

apnī zarūriyāt ke pīchhe paḌā huuñ maiñ

is zindagi se ek laDai laDa hun main

tab ja ke is maqam pe aa kar khaDa hun main

meri ana se mujh ko ijazat nahin mili

aur wo samajh rahe hain ki zid par aDa hun main

qad ka nahin baDa pe jasarat to dekhiye

kitne baDe baDon ke barabar khaDa hun main

ab zimmadariyon ki saza jhelni paDe

mera qusur ye hai ki ghar mein baDa hun main

apne pidar ke hukm ki tamil na karun

hun main baDa magar kahan itna baDa hun main

hain aap jauhari to parakhna hai aap ko

apne har ek sher mein moti jaDa hun main

duniya zaruriyat ko pura bhi kar chuki

apni zaruriyat ke pichhe paDa hun main